Estás en: Portada / Sala de comunicacións / Actualidade

O Diario Oficial de Galicia publica hoxe o anuncio polo que se remata o procedemento de participación pública

A Xunta aproba o proxecto para a construción dunha senda peonil no treito da AC-543 que une Laraño e Vidán con Santiago de Compostela

O orzamento previsto para a execución destas obras é de preto de 600.000 euros

A actuación, destinada a mellorar a seguridade viaria, empezará na glorieta que une a estrada coa Avenida da Mestra Vitoria Míguez e a Rúa Ponte Vella, coa execución de 2 km na marxe dereita e dous pequenos tramos na marxe esquerda
 

  • Sendas peonís do treito que une Laraño e Vidán
  • Sendas peonís do treito que une Laraño e Vidán

Santiago, 1 de febreiro de 2016.- A Xunta de Galicia, a través da Axencia Galega de Infraestruturas (AXI) vén de aprobar o proxecto para a construción de sendas peonís o treito que une Laraño e Vidán con Santiago, na estrada AC-543, tal como anuncia hoxe o Diario Oficial de Galicia (DOG) http://www.xunta.es/dog/Publicados/2016/20160201/AnuncioG0181-260116-0001_gl.html.

A Consellería de Infraestruturas e Vivenda realizará este ano unha achega económica de preto de 600.000 euros, para a execución destas actuacións, e materializaranse con cargo á partida orzamentaria de fomento da mobilidade sostible urbana e interurbana recollida no proxecto de Orzamentos da comunidade para 2016.

O obxecto deste proxecto é a construción dun itinerario peonil seguro e accesible que permita a circulación de peóns pola marxe dereita da citada estrada, entre os pq 0+000 e 2+000, nas parroquias de Laraño e Vidán, comunicando estes núcleos con Santiago de Compostela.

O inicio da actuación sitúase na parroquia de Vidán, concretamente na glorieta que une a estrada coa Avenida da Mestra Vitoria Míguez e a Rúa Ponte Vella.

No tramo no que se actuará localízase un elevado número de vivendas e negocios, o que ocasiona un significativo tránsito de peóns que actualmente circula pola beiravía. Neste sentido, as accións proxectadas mellorarán a súa seguridade viaria, fixándose como punto básico a construción dun itinerario ao longo de 2 quilómetros na marxe dereita e dous pequenos tramos na marxe esquerda, co fin de separar o tráfico rodado do peonil.

Nos seguintes planos amósase o trazado polo que se desenvolverán as citadas sendas peonís.