Estás en: Portada / Sala de comunicacións / Actualidade

Benestar promove en Madrid o Plan de dinamización demográfica de Galicia executado en máis dun 60 por cento

A directora xeral de Familia e Inclusión, Amparo González, participou hoxe en Madrid nunha mesa redonda das V Xornadas sobre Parentalidade positiva do Ministerio de Sanidade, Servizos Sociais e Igualdade e a Obra Social ‘La Caixa’

Expuxo as 69 medidas que contén esta folla de ruta que se empezou a poñer en marcha en abril de 2013

González destacou a importancia de promover unha Estratexia nacional que faga fronte ao problema demográfico, ao tempo que reiterou a necesidade dun Plan de Estado nesta materia

Resaltou que Galicia situarase o próximo ano á cabeza de todas as autonomías en beneficios fiscais no eido da natalidade

 

Madrid, 19 de decembro de 2014.- A directora xeral de Familia e Inclusión, Amparo González, promoveu hoxe en Madrid o Plan de dinamización demográfica de Galicia, que se empezou a executar en abril de 2013, e que constitúe unha “folla de ruta” composta por 69 medidas para facer fronte á problemática da demografía. Actualmente, e en menos de dous anos, xa están a executarse máis do 60 por cento destas actuacións, segundo destacou González na mesa redonda ‘Experiencias en conciliación da vida familiar e laboral’ na que participou, no marco das V Xornadas sobre Parentalidade positiva organizadas polo Ministerio de Sanidade, Servizos Sociais e Igualdade e a Obra Social ‘La Caixa’ para reflexionar sobre as necesidades de apoio e de servizos de calidade das familias españolas.

Con respecto ao plan, a responsable da área autonómica fixo especial fincapé nos apoios económicos. Recordou que este mesmo ano se incrementou nun 20 por cento a dedución fiscal por nacemento ou adopción dun fillo –de 300 a 360 euros-; e implantouse a exención de prezo público nas escolas da rede autonómica para o segundo fillo e posteriores para as rendas máis baixas.

O próximo exercicio, sinalou, a dedución incrementarase ata os 1.200 euros anuais no caso do segundo fillo; e ata os 2.400 no caso do terceiro ou sucesivo. Este incremento farase extensivo ás familias galegas que non teñen obriga de presentar a declaración da renda e que tampouco a presenten voluntariamente, xa que percibirán unha contía equivalente á dedución fiscal. Deste xeito, Galicia situarase á cabeza de todas as autonomías en beneficios fiscais en materia de natalidade.

No que se refire á conciliación, salientou que se incrementaron en máis do 60 por cento as prazas públicas en escolas infantís desde 2009; e que se ten promovido a flexibilidade horario e o teletraballo na Administración pública, uns beneficios aos que xa se acolleron máis de 7.000 empregados públicos.

Adiantou, ademais, que en 2015 se creará o Observatorio galego de dinamización demográfica; que se porá en marcha unha “nova fórmula para a conciliación no medio rural” como son as casas niño; e que se está a ultimar a Carteira de servizos sociais de familia, infancia e adolescencia, o que permitirá ampliar e diversificar os servizos destinados ás familias.

Así mesmo, González apuntou que Galicia ten un problema engadido: a dispersión da poboación, que pode levar a unha situación de exclusión territorial. Para atallalo, estase a acometer un incremento continuo dos servizos sociais nas áreas rurais; puxéronse en marcha programas de reequilibrio territorial, como o Impulsa Lugo e Ourense; aumentáronse os incentivos fiscais á natalidade nun 20 por cento para os nacementos en concellos de menos de 5.000 habitantes; e, na Estratexia de Inclusión Social 2014-2020, aprobada onte no Consello da Xunta, incluíuse por primeira vez e de xeito transversal a loita contra a exclusión territorial.

Pacto de Estado
Ademais, a responsable da área autonómica reiterou en Madrid a necesidade de promover unha Estratexia nacional que faga fronte ao problema demográfico, ao tempo que volveu demandar a necesidade dun Pacto de Estado nesta materia. Lembrou que Galicia forma parte do Foro de rexións con desafíos demográficos (FREDD) facendo especial fincapé nos avances conseguidos a través do traballo conxunto destas comunidades como o feito de ter conseguido que o Goberno central incluíra un obxectivo transversal denominado “cambio demográfico” no Acordo de asociación de España 2014-2020 remitido á Comisión Europea, coa finalidade de reforzar o financiamento comunitario para as estratexias de relevo xeracional.

González sinalou, para rematar, que o FREDD tamén trasladou o seu traballo ao Comité das rexións e ao Comisario de asuntos sociais en Bruxelas, e solicitou que se aplique a transversalidade na materia demográfica a nivel estatal.