Estás en: Portada / Sala de comunicacións / Actualidade

Os cadros da artista viguesa combinan coñecemento da harmonía, da rima cromática e a imaxinación pictórica

A exposición de Alicia Solla estará na Casa de Galicia ata o 28 de marzo

  • Un momento da presentación da exposición de Alicia Solla na Casa de Galicia
  • Un momento da presentación da exposición de Alicia Solla na Casa de Galicia

Madrid, 4 de marzo de 2014.-  A Casa de Galicia acolleu esta tarde a inauguración da mostra pictórica da artista viguesa Alicia Solla, que permanecerá na Sala A da institución galega ata o día 28 deste mes. No acto interviñeron o coordinador de actividades da Casa, Ramón Jiménez; a licenciada en Humanidades e gran coñecedora da obra de Alicia Solla, Ruth Martínez, e a propia pintora.

Jiménez manifestou estar completamente de acordo coa análise que fai Emilio Gavilanes no prólogo do catálogo da exposición, "sumamente revelador", no que pon de manifesto "a pintura mental de Alicia". Coincide tamén "coa idea subxacente de que o autor non é o mellor coñecedor da súa propia obra, como aseguran repetidamente destacados especialistas, psiquiátricos engado, sobre o acto da creación artística en xeral. E sobre a afirmación da pintora de que "dentro de nós hai outro", que o prologuista pon en relación co mandato socrático" e que "en realidade "dentro de nós hai moitos", como tantas veces a Literatura revelou".

Pola súa banda, Ruth Martínez, evocou a figura de Álvaro Cunqueiro cando dicía "Na aspereza da vida cotiá, soñar é necesario". E sinalou que "Soñar e facer soñar é un don daqueles privilexiados que obedecen de xeito total e con xenerosa entrega á propia fantasía/imaxinación". E estableceu unha similitude: "Ao igual que Álvaro Cunqueiro sempre escribiu o que lle gustaba e como lle gustaba, Alicia Solla pinta o que lle gusta e como lle gusta". E aludiu tamén ao texto de Gavilanes cando di que a pintura de Solla "se move entre dúas barreiras, unhas veces máis preto da luz e o aire e outras máis preto da sombra, do interior".

Martínez dixo tamén que, "En esencia, ese é o dominio da imaxinación, o que esvaece sen delimitar, integrando e mesturando, a fantasía e a realidade. Alicia Solla, é unha pintora que funde, cun intimismo experiencial exquisito, a imaxinación poética e a plástica. A súa obra non necesita ser explicada para que a explicación reflicta unha realidade mental que sexa compredida co corazón".

Alicia Solla, tras os agradecementos, recordou que este ano o seu primeiro cadro cumpre xa 40 anos, e evocou como antes de pintar non entendía que alguén puidese facelo nun estudo, sen contemplar nada, tan só baseándose na propia imaxinación. "Agora eu fágoo e pregúntome como poden asomarse os libros ao mundo, ou como é posible falar ben en público, algo que a min cóstame moito", e ironizou emprazando os presentes, “aquí mesmo, para que poidan ver todos o meu gran dominio da escena, dentro de 40 anos".

Alicia Solla naceu en Vigo, onde pasou a súa infancia e primeira xuventude, vivindo posteriormente en diferentes cidades españolas. Durante os anos 1976-1979 estudou pintura na Escola de Alberto Castro Couso na súa cidade natal, onde se reúne con outros mozos pintores formando o grupo Abracadabra, e con quen expuxo en diferentes cidades de Galicia. A partir do seu traslado a Cuenca, en 1983, a súa visión da vida vai sufrir un cambio importante, o cal se reflicte na súa pintura: abandona case por completo o óleo, experimentando con diversas técnicas sobre papel e empeza unha obra de carácter máis intimista, de acentuado expresionismo. Nesta etapa descobre a súa vocación poética, que queda recollida en varios libros ilustrados e confeccionados a man. Así mesmo empeza a interesarse pola fotografía, o que se plasma nunha serie de proxeccións de diapositivas en varias salas e galerías. Actualmente reside en Madrid.
 

Tema: Cultura
Departamento: A Presidencia da Xunta